kåʹddvaalprogramm 2021

RKP kåʹddvaalprogramm 2021, vuäʹnkõs versio

Kåʹddvaalid riâžžât ǩieʹssmannu 13. peiʹvv 2021. RKP võboršeeʹǩǩ kåʹddvaalin da puk kåʹddvaalprogrammâm ruõccǩiõʹlle, lääddas da eŋgglõsǩiõʹlle kaaunak addrõõzzâst kommunalval.sfp.fi

Ââlda tuu

Lääʹdd ruõcclaž meerpeällõk (RKP) tuejjad tuâj frijjvuõđ, vuõiggmiõllsâžvuõđ, tääʹssäärv da sååvšemvuõđ peäʹlest. Haaʹleep vueiʹnned tåimmai kueʹhttǩiõllsažvuõđ da haaʹleep tueʹjjeed politiikk, koʹst ooumaž lij kõõskâst. Lääʹdd ruõcclaž meerpeällõk haaʹlad, što pukin kåʹddniiʹǩǩin lij vueiʹttemvuõtt jieʹlled pueʹrr jieʹllem, ouddned, ravsmed da leeʹd leklva. Haaʹleep, što fiʹttjõs ruõcc ǩiõlâst da jeeʹres ǩiõlin lij pueʹrr obb jânnmest. Pukin feʹrttai tuõsttâd mainsted jiiʹjjes ǩiõlin.

Täk vaal lie vääžnai, ǥo kooʹddin tueʹjjeemnalla åårrai tuʹmmstõõǥǥ vaikkte tuʹnne da tuu arggsad.

Pueʹrmõs škooul

Lääʹddjânnam lekkvuõtt raajsmââvv pueʹrr da tääʹssärvvsaž škooultõʹsse. Pukin päärnain lij vuõiggâdvuõtt õllklaassaž ouddpiõmmu. Määŋgpeällsaž ǩiõllmättʼtõõzz âlgg altteed juʹn vuõss-škooulâst. Haaʹleep, što õinn jäänbin lij vueiʹttemvuõtt ǩiõll-laauǥškooultõʹsse da ǩiõllroʹsse. Haaʹleep, što päärna mäʹšše peiʹvvpõõrtin da škooulin. Päärnain õõlǥči leeʹd vueiʹttemvuõtt staarjõõttâmtåimmjummša škooulpeeiʹv õhttvuõđâst. Juäʹtǩǩep investâsttmõõžžid õlltässʼsaž lookkjiškooultõʹsse. Ämmattlaž škooultõõzz da tuâjj-jieʹllem kõskksaž õhttsažtuâjj lij vääžnai, leâša tõn âlgg tueʹjjeed nuʹtt, što tuâjast mättjummuš da teoriamättʼtõs lie tääʹssteäddast kõskkneez.

Puârastvââʹjji aassi

RKP veekk ooudâs õhttsažkååʹdd, koʹst puk toʹbdde, što lie staanâst da vâjja puârast. Haaʹleep, što kåʹddneeʹǩǩ vuäǯǯa še juätkast âlddkääzzkõõzzid. Pukin âlgg leeʹd vuõiggâdvuõtt nuʹtt tåimmjeei tiõrvâsvuõtt- da puõccihåiddu ǥu še âkkõõvvmi håiddkääzzkõõzzid ǥu tõk šâʹdde ääiʹjpoddsaž. Åskkap, što saʹtssjummuž liikkummša, spoʹrtte da kulttuuʹre räʹjje mij kooʹddin jieʹllemviõkksaž da tõin määšš. Haaʹleep, što kååʹdd tueʹjjee tuâi ođđ läʹddlaid vuässõõttmõõžž diõtt. Pukin kooʹddin âlgg leeʹd frijj rasiismâst.

Puârast hoiddum tääll da jieʹllemvueʹǩǩjääll pueʹrmõs oudldõõzz

Määŋgain kooʹddin tääll lij kõrr sââʹjest. Puârast hoiddum kåʹddtääll rääjj pueʹrmõs oudldõõzzid kååʹdd tåimmai aʹrǧǧe. Kooʹddi da jieʹllemvueʹǩǩjääll kõskksaž õhttsažtuâjj lij vääžnai. Haaʹleep, što kååʹdd räʹjje oudldõõzzid põrggsid, tõt lij pueʹrren kådda da ceâlai jânnma. Haaʹleep, što kååʹdd tueʹjjee aktiivlânji tuâi tuõjju vuâđđõõvvi jânnmaseʹrddem ooudâs viikkmõõžž diõtt.

Ooudâstjooʹtti äimmõs- da pirrõsaaʹššin

Kååʹdd âʹlǧǧe leeʹd mieʹldd äimmõsjeärmmai räʹtǩǩummši kaunnmõõžžâst. RKP tueʹjjad tuâj tõn ouʹdde, što Lääʹddjânnam kååʹdd lie äimmõsneutraal eeʹjj 2030. Õinn šõõddi energia âânnmõʹšše serddmõõžž âlgg viikkâd ooudâs. Haaʹleep, što âinn jäänab âʹnne ǩeâllʼjeei jååʹttemneävvaid. Gåårdin âlgg leeʹd tåimmai joukktrafikk. Haaʹleep, što kååʹdd saʹtssje še tåimmjummšstes šõõddi tuʹšš njieʹšš uuʹccummša. Tät õõlǥat nokk määŋgast noorrâmpääiʹǩest šõõddi tåimmjeei kâârvtummuž, ođđestâânnmõõšš da njeäʹššǩiõttʼtõõllmõõžž. Haaʹleep, što kååʹdd še câʹǧǧe luâđ määŋghämmsažvuõđ ǩeeuʹhjõõvvmõõžž.